Fréttir

Fiskidagurinn mikli 2019 heiðrar Gunnar Arason, fyrrverandi skipstjóra. Gunnar er heiðraður fyrir framlag sitt til sjávarútvegs og farsælan skipstjóraferil með skip frá Dalvík. Hann varð skipstjóri hjá útgerð Aðalsteins Loftssonar á Dalvík árið 1963, þá aðeins 22 ára gamall, fyrst með Baldvin Þorvaldsson EA 24 og síðan Loft Baldvinsson EA 124. Árið 1968 tók hann við nýju og glæsilegu skipi, Lofti Baldvinssyni EA 24. Síldin hafði þá breytt göngu sinni frá hefðbundnum miðum íslenskra fiskiskipa. Hinu nýja skipi var þá um haustið haldið til veiða í Norðursjónum og náði á stuttum tíma frábærum árangri við síldveiðar þar og frágang aflans, sem tryggði þeim hæstu verð. Það varð með öðru til þess að Loftur Baldvinsson EA 24 var um árabil með mestu verðmæti allra íslenskra fiskiskipa. Gullaldarár skipsins voru þegar best gekk í Norðursjónum á árunum 1970 til 1975. Skipverjar á Lofti Baldvinssyni voru flestir frá Dalvík og það munaði um það að tekjuhæstu sjómenn landsins bjuggu hér. Það er stundum talað um það að heil gata hafi meira og minna verið byggð einbýlishúsum skipverja á Lofti á þessum árum. Aukin verðmæti vegna gæða aflans urðu aðall áhafnar Lofts Baldvinssonar og þar fór skipstjórinn fremstur meðal jafningja.

Á Fiskidaginn mikla laugardaginn 10. ágúst milli kl. 12.00 og 15.00 verður nýbygging frystihúss Samherja til sýnis. Hægt verður að ganga merktan hring og sjá hvernig byggingin stendur. Vonast er til að byggingin verði tilbúin síðar á árinu.

Kæru gestir Fiskidagsins mikla. Björgunarsveitin Dalvík hefur undanfarin ár safnað dósum og flöskum á Fiskidaginn mikla, en við viljum gera enn betur. Þess vegna munum við afhenda gestum tjaldsvæðanna hvítan poka undir dósir og flöskur sem falla til á meðan þið dveljið hjá okkur á Fiskidaginn mikla. Pokann skiljið þið eftir í dósadöllum sem finna má á nokkrum stöðum á tjaldsvæðinu og víðar um bæinn. Við ítrekum þó að ekki á að setja rusl í þennan poka, eingöngu einnota drykkjarumbúðir. Á hátíðarsvæðinu á laugardaginn er allt rusl flokkað í kör og eru sérstakir dallar fyrir gosflöskur/dósir, hjálpumst að við að vernda umhverfið og flokkum í rétta dalla. Félagar í Björgunarsveitinni Dalvík þakka kærlega fyrir stuðninginn og munu sjá til þess að plastpokinn fari í endurvinnslu. Ps. Ef pokinn þinn fyllist er hægt að fá nýjan í sundlauginni og í aðstöðuhúsi tjaldsvæðisins.

Skelltu þér um borð í Börk NK frá Neskaupsstað. Síðastliðið vor tók Árni Gunnarsson kvikmyndagerðarmaður og sagnfræðingur frá Sauðárkróki 360° sýndarveruleikamyndband af lífi og störfum um borð í Berki NK frá Neskaupsstað. Afraksturinn geta gestir Fiskidagsins mikla séð í nýjum sýndarveruleikagleraugum í allt að 5K upplausn. Skipstjóri í ferðinni var Hjörvar Hjálmarsson. Skipið var á kolmunaveiðum í færeysku lögsögunni. Tekin voru viðtöl við áhafnarmeðlimi og fylgst með störfum hvers og eins. Hér er um að ræða 360° sýndarveruleikamyndefni sem gefur einstaka sýn inn í líf og störf sjómanna

Fyrir sælkera á ferð um Svarfaðardal Vellir er kirkjustaður í Svarfaðardal, ca 5 mín akstur frá Dalvík, en þar er nú rekin lítil sælkerabúð. Þar má finna margt spennandi fyrir sanna sælkera t.d. reykta osta, bleikju, lax, ostrusveppi, sultur, sósur og margt fleira. Opið alla daga frá kl 13-18.

Valka er hátæknifyrirtæki sem sérhæfir sig í hönnun og markaðssetningu á tækjum og hugbúnaði fyrir fiskvinnslur. Lausnir Völku miða að því auka afköst, nýtingu og nákvæmni fyrir viðskiptavininn. Vörur fyrirtækisins eru fjölbreyttar, allt frá stökum vogum, innmötunar lausnum og flokkarbúnaði til flæði- og skurðarlína sem og sjálfvirkt pökkunarkerfi. M.a munu tæki frá Völku verða í nýju hátækni fyrstihúsi Samherja á Dalvík. Starfsmenn Völku verða með fiskisúpu á súpukvöldinu góða föstudagskvöldið 9. ágúst milli kl. 20.15 og 22.15 og verður það heima hjá starfsmanni Völku á Dalvík Snæþóri Vernharðssyni og býr hann í Mímisvegi 14. Þess má geta að Valka er einn af styrktaraðilum Fiskidagsins mikla og greiðir m.a annars fyrir dreifingu á blaði dagsins.

Þyrlusýning Landhelgisgæslunnar. Þyrla Landhelgisgæslunnar verður gestur á Fiskidaginn mikla og startar honum að morgni laugardagsins 10. ágúst með stæl. Dagskrá Fiskidagsins hefst að venju kl. 11.00 en að þessu sinni verður þjófstartað kl 10.30 með flug og björgunarsýningu þyrlu landhelgisgæslunnar sem verður svo til sýnis í kjölfarið.

Steinofninn á Böggvisstöðum Böggvisbrauð hefur opið um fiskidagshelgina. Frá fimmtudegi til laugardags opið milli kl. 16.00 og 19.00 og á sunnudeginum 11. ágúst opið milli kl. 10.00 og 12.00. Brakandi fersk lífræn súrdeigsbrauð úr steinofni. Gengið er inn á vesturhlið hússins um hvítu dyrnar.

Strandhreinsun Fiskidagsins Mikla, Arctic Adventures og samstarfsaðila 8. ágúst. Við leitum eftir fleiri samstarfsaðilum og sjálfboðaliðum í verkefnið sem snýst um fjörur í Eyjafirði og nágrenni. Sumar fjörur eru auðhreinsaðar fótgangandi, aðrar fjörur krefjast báta og sérstaks búnaðar. Við hvetjum fólk til að taka þátt í þessu með okkur. Þú getur tekið þátt með skráningu í mismunandi ferðir. Áhugasamir þátttakendur skrái sig á facebooksíðunni „Strandhreinsun Fiskidagsins mikla, senda email á freyr.antonsson@adventures.is eða hringt í síma 8976076 Bátsferð þar sem fólk verður ferjað í land á minni bátum. Byrjað fótgangandi en sótt í fjöru við endastöð. Byrjað og endað fótgangandi. Skreppa í fjöruferð með fjölskylduna og týna rusl sem finnst. Tökum til í Eyjafirði. Skráir þig til leiks og ferð í fjöru við þína heimabyggð í Eyjafirði og týnir rusl sem þar er að finna. Skilar því til okkar eða lætur sækja til þín. Klukkan 10:00 fimmtudagsmorguninn 8. ágúst fer Draumur úr höfn á Dalvík áleiðis í hreinsun í Fjörður, áætlað að fara í Hvalvatnsfjörð og Þorgeirsfjörð. Þátttaka opin en gera skal ráð fyrir 8 tíma degi. Erfiðleikastuðull 3,5 af 5. Markmiðin eru að hreinsa eins mikið af strandsvæðum Eyjafjarðar og nágrennis og hægt er miðað við þátttöku og veður. Safna saman öllu ruslinu sem finnst í fjörunum og sýna 10. Ágúst á hátíðarsvæði Fiskidagsins Mikla. Vekja fólk til umhugsunar um umhverfið okkar og hvernig sumir hlutir enda í sjónum og síðar í fjörum landsins