Fréttir

Samherji og Fiskidagurinn bjóða börnum að skapa nýja fiskaveröld. Náttúran hefur skapað marga fiskana og í hafinu leynast þúsundir tegunda. Samherji veiðir t.d. um 50 þeirra. Á Fiskidaginn mikla milli kl 11.00 og 17.00 í salthúsinu verður börnum boðið að skapa og nota hugmyndaflugið til að búa til enn fleiri fiska. Börn á öllum aldri eru hvött til að teikna fisk, gefa honum nafn og hengja hann upp. Allir sem skila mynd fá glaðning. Þegar líður á daginn verður til mögnuð fiskasýning sem stækkar sífellt eftir því sem líður á daginn. Samherji, Fiskidagurinn mikli og börnin bjóða alla velkomna á sýninguna.

Fiskasýning, Andlitsmálun, Disney kastali, þyrluflug og sýndarveruleikavideó. Skemmti og afþreyingar dagskráin á hátíðarsvæðinu milli 10.30 og 17.00 er fjölbreytt. Dagskráin hefst með látum þegar þyrla landhelgisgæslunnar sýnir listir sínar. Árni frá Skottafilm á Sauðárkróki verður með sýndarveruleikavideó frá vinnslu og veiðum. GG sjósport leyfir öllum að prófa Sit-On-Top kajakana. Fjöldi fallegra og fægðra fornbíla frá Bílaklúbbi Akureyrar verða til sýnis. Danshópurinn vefarinn sýnir þjóðdansa vítt og breytt um svæðið. Frá Reykjavík kemur hinn magnaði danshópur Superkidsclubjr. Teikniveröld fyrir börnin í salthúsinu og börnin fá glaðning þegar þau skila mynd. Fimleikafélag Akureyrar sér um andlitsmálun. Grímseyjarferjan verður við ferjubryggjuna. Myndasýning um starfsemi Samherja til sjós og lands. Vinir okkar úr Latabæ dreifa happadrættismiðum. Leikhópurinn Lotta verður með tvær sýningar yfir daginn á hátíðarsvæðinu þar sem að þau verða með söngva úr leikritunum sem að þau hafa sýnt s.l. 11 ár. Fiskasýningin magnaða var sett upp innandyra í fyrra og endurbætt og nú höldum við þeim endurbótum áfram með lýsingu, textum, myndböndum og fleiru. Um miðjan daginn verður sýndur hákarlaskurður. Listamenn dansa, syngja, spila, mála, teikna og sýna listir sínar víða um svæðið. Að venju er Björgunarsveitin á Dalvík með tjald á bryggjunni þar sem að hægt er að fá skyndihjálp og leita má til þeirra vegna týndra barna og fleira.

Markaður við Dalbæ. Miðvikudaginn 7. ágúst standa íbúar og starfsfólk Dalbæjar fyrir skemmtilegum fjölskylduprúttmarkaði við Dalbæ frá kl. 13.00 – 16.00. Um er að ræða einstakan fjáröflunarviðburð, öllum til gleði og ánægju. Þar má m.a. finna fatnað, skrautmuni, eldhúsáhöld, handverk, árstíðarvörur, bækur, sultur, bakkelsi og fl. Sala á vöfflukaffi, tónlist og fjör. Ath. það er ekki posi á staðnum. Allur ágóði rennur til endurbóta á aðstöðu fyrir íbúa Dalbæjar. Vinir og velunnarar heimilisins sem vilja gefa muni til þessa viðburðar vinsamlegast komið þeim á Dalbæ. Tekið er á móti brauði, bakkelsi og ferskum varningi á Dalbæ um hádegi, sama dag. Allir velkomnir, bestu kveðjur starfsfólk og íbúar Dalbæjar.

Litla hafmeyjan og gleðistund í kirkjunni. Föstudaginn 9. ágúst kl.16.00 sýnir leikhópurinn Lotta leikritið um litlu hafmeyjuna í kirkjubrekkunni, miðasala á staðnum. Klukkan 17.00 sama dag verður árleg gleði og Fiskidagsmessa í Dalvíkurkirkju. Séra Magnús G. Gunnarsson stýrir gleðinni, ræðumaður verður Kristján Þór Júlíusson úr Hólaveginum. Um tónlistina sjá Regína Ósk og Svenni Þór.

Vinátta – Setning – Mamma hljómar Það má segja að setning Fiskidagsins mikla sé með Vináttukeðjunni kl. 18:00, föstudaginn 9. ágúst.Á Vináttukeðjunni koma fram: Ljótu hálfvitarnir, Hljómsveitin Angurværð, Friðrik Ómar Hjörleifsson, Gyða Jóhannesdóttir og karlaraddir úr Dalvíkurbyggð. Vinátturæðuna 2019 flytur fulltrúi Hinsegin daga í Reykjavík. Börnin fá fána og knúskortum og vináttuböndum verður dreift. Í lokin verður risaknús til þess að leggja vináttu og náungakærleikslínur fyrir helgina. Einnig verður flutt hið árlega lag “Mamma” sem endar í háum tónum og bombum. Lagið er eftir Friðrik Ómar Hjörleifsson og textinn eftir stjórnarformann Fiskidagsins Mikla Þorstein Má Aðalsteinsson

Gallerý nærendi - Smábílasafn og verkstæði Sigurvin Þórhallur Jónsson opnar smábílasafn og verkstæði í norðurenda afgreiðslu Samskipa á hafnarsvæðinu á Dalvík. Opnunin verður þriðjudaginn 6. ágúst frá kl 17.00 – 19.00. Sigurvin mun einnig vera með kærleikshjörtun sem hann framleiðir. Opnunartími í Fiskidagsviku, þriðjudagur til fimmtudags 17.00 – 19.00. Allir velkomnir.

Samherji kynnir í samstarfi við Rigg viðburði, Fiskidaginn Mikla, Samskip, Exton og Björgunarsveit Dalvíkur: Fiskidagstónleikarnir 2019 verða haldnir sem fyrr við hafnarsvæðið á Dalvík 10. ágúst nk. Hljómsveit Rigg viðburða leikur undir hjá þjóðþekktum söngvurum sem flytja sín vinsælustu lög í útsetningum Ingvars Alfreðssonar. Gestgjafar eru heimamennirnir Friðrik Ómar, Eyþór Ingi og Matt Matt. Gestasöngvarar Fiskidagstónleikana 2019 eru: Svala, Valdimar, Auður, Páll Óskar, Sigga Beinteins, Grétar Örvarsson, Hr. Hnetusmjör, Þorgeir Ástvaldsson, Eyjólfur Kristjánsson og Bjartmar Guðlaugsson. Í kjölfar tónleikana verður glæsileg flugeldasýning. Allir hjartanlega velkomnir. Hljómsveitarstjórn: Ingvar Alfreðsson Dansar: Birna Björnsdóttir Hljóð: Haffi Tempó Lýsing: Helgi Steinar Grafík: Pálmi Jónsson Verkefnastjórn Exton: Steinar Snæbjörnsson Verkefnastjórn Rigg: Haukur Henriksen Sviðsetning og yfirumsjón: Friðrik Ómar

Dalvík/Reynir – Tindastóll. Skagfirðingar sækja Dalvík/Reyni heim í Fiskidagsleiknum þetta árið. Þetta verður spennandi Derby leikur í 2. deildinni. Leikurinn hefst kl 19.15 fimmtudaginn 8. ágúst. Fjölmennum á völlinn. All star knattspyrnuleikur. All star knattspyrnuleikur verður leikinn á nýja gervigrasinu við íþróttamiðstöðina föstudaginn 9. ágúst kl. 14.00. Gamlar heimahetjur leika listir sínar. Einstakt re-union. Áhugasamir þátttakendur skrái sig hjá Biggó. birgir@icefresh.is

Bronsverðlaunahafar á Fiskideginum mikla TheSuperKidsClub JRS frá dansskólanum – Dans Brynju Péturs unnu til bronsverðlauna á Dance World Cup sem er erlend keppni sem var haldin í Braga í Portúgal. Atriðið var samið af þeim sjálfum og sópuðu krakkarnir úr Dans Brynju Péturs að sér medalíum í sínum flokkum á þessari alþjóðlegu danskeppni þar sem 6000 dansarar tóku þátt frá 60 löndum í ýmsum stílum. Fiskidagurinn mikli óskar þeim til hamingju og hlakkar til að fá þau á Fiskidaginn Mikla í annað sinn. Þau munu dansa á sviðinu yfir daginn og hér og þar á hátíðarsvæðinu